O COETG celebra o Día Mundial das Telecomunicacións e a Sociedade da Información (DMTSI), que terá lugar o sábado día 17 de maio, coa Unión Internacional de Telecomunicacións (UIT), na que xa están subidas as súas iniciativa (http://www.itu.int/en/wtisd/2014/Pages/promotion.aspx), entre elas, o cartel do DMTSI en galego e coa publicación da revista A Nosa Rede, dedicada este ano a: “A banda larga para o desenvolvemento sustentable", lema escollido pola UIT para conmemorar esta data, e tamén coa publicación do seu xa tradicional Manifesto no xornal La Voz de Galicia do sábado, coincidindo coa festa das Letras Galegas.

Outro acto tamén organizado polo COETG para conmmemorar este día foi a visita á CRTVG - Compañía Radio-Televisión de Galicia que tivo lugar o 8 de maio e na que os colexiad@s/asociad@s tiveron a oportunidade de recorrer tanto as instalacións da Televisión de Galicia como as correspondentes da Radio Galega. Guiados da man dos enxeñeiros de telecomunicacións do equipo directivo e técnico do departamento de Enxeñería da Televisión de Galicia, puidose coñecer tanto os equipos de telecomunicacións como as salas de posprodución de vídeo e os estudios da compañía. Visitouse tamén o arquivo e as instalacións de Retegal.

E destacable tamén a participación de representantes do COETG na xornada "As TIC e a e-Administración no marco das Smart Cities”, que organizada por CONETIC coa colaboración de Ineo, tivo lugar o 9 de maio en Vigo e na que tamén participaron representantes dos catro concellos galegos que están a levar a cabo iniciativas de Smart City e diversas empresas tecnolóxicas que puxeron en común a súa experiencia no desenvolvemento de proxectos para contornas intelixentes.

Con estas iniciativas o COETG súmase á levada a cabo pola UIT para conmemorar este día e que baixo o lema “A banda larga para o desenvolvemento sustentable” insta ás entidades a organizar todo tipo de actividades e a aumentar a sensibilización e consenso neste ámbito a todos os sectores da sociedade.