Presentación do Dicionario Enciclopédico Galego das TIC


Interveñen:

• D. Ramón Bermúdez de Castro Olavide, Decano do COETG.
• Dna. Helena Veiguela Martínez, Directora Xeral de Promoción Industrial e da Sociedade da Información. Consellería de Innovación e Industria.
• D. Xavier Alcalá Navarro, Presidente do Comité de Dirección do Dicionario Enciclopédico Galego das TIC.

O SECRETARIO XERAL DO COETG, RAMÓN MARÍA LOIS, E A PROFESORA DE FILOLOXÍA GALEGO-PORTUGUESA DA UNIVERSIDADE DA CORUÑA, PILAR GARCÍA NEGRO, DISERTARON SOBRE O FUTURO DA LINGUA GALEGA NA ERA DIXITAL.

A presentación do Dicionario Enciclopédico Galego das TIC, que dirixe o polifacético Xavier Alcalá, e a reflexión sobre o futuro da lingua galega na era dixital, son as principais accións que promoveu o COETG para conmemorar, xunto coa Dirección Xeral de Promoción Industrial, o Día Mundial das Telecomunicacións e da Sociedade da Información 2008. O acto, que foi clausurado pola directora xeral de Promoción Industrial e da Sociedade da Información, tivo lugar este mediodía no hotel Porta do Camiño, de Santiago.

Este mediodía o Colexio Oficial de Enxeñeiros de Telecomunicación de Galicia (COETG), en colaboración coa Dirección Xeral de Promoción Industrial, da Consellería de Innovación e Industria, centraron a celebración do Día Mundial das Telecomunicacións e da Sociedade da Información 2008 en dúas accións que conectan a lingua galega coas tecnoloxías da información e da comunicación.

A presentación do Dicionario Enciclopédico Galego das TIC ocupou a primeira parte do acto conmemorativo, no que interviñeron o decano do COETG, Ramón Bermúdez de Castro Olavide e o presidente do Comité de Dirección do Dicionario, Xavier Alcalá Navarro, quen, ademais de achegar os primeiros resultados do proxecto en canto a escolma de termos e criterios de selección, falou da intencionalidade do Dicionario, da súa produción e metodoloxía de traballo, así como da súa promoción e divulgación na rede, a partir da súa experiencia persoal centrada no feito de que ao colectivo de enxeñeiros “cómprenos a aplicación correcta dos códigos. O código fundamental para os humanos é a fala. Por iso, nós temos unha especial obriga na corrección e na economía dos termos”, de aí que para Alcalá sexa “obxectivamente encomiable o Dicionario que nos propomos levar ao dominio dos feitos”.

Segundo Alcalá Navarro, o proxecto do Dicionario Enciclopédico Galego das TIC nace coa vocación de converterse no compendio documental de referencia que inclúa os termos e definicións conceptuais que expresan o amplo universo das TIC e da Sociedade da Información en Galicia. Promovido polo COETG, en colaboración coa Consellería de Innovación e Industria da Xunta de Galicia, coa Universidade de Vigo a través da Escola Técnica Superior de Enxeñeiros de Telecomunicación, e coa Real Academia Galega, a iniciativa responde ao interese do colexio profesional, para que as comunidades profesionais, tecnolóxicas e empresariais, así como alumnos e profesores de ensino medio en bacharelato e superior nas universidades, dispoñan de ferramentas lingüísticas que lles permitan expresar e entender, na lingua propia, todos os termos e conceptos que definen as TIC e a Sociedade da Información do noso país.



O Dicionario Enciclopédico Galego das Tecnoloxías da Información e da Comunicación, no que traballan máis de 30 expertos, conta coa supervisión técnica e científica da Escola Superior de Enxeñeiros de Telecomunicación de Vigo e coa supervisión lingüística da Real Academia Galega. A súa produción desenvolverase en tres anos e aloxarase na web corporativa da AETG (www.aetg.gal) e nos dominios de Internet da ETSET de Vigo (www.teleco.uvigo.es) e da Real Academia Galega (www.realacademiagalega.org), actualizándose de xeito permanente e creándose na súa contorna grupos de traballo para o desenvolvemento conxunto da lingua e das tecnoloxías.

O Comité conta con, ademais de co seu Presidente, o polifacético enxeñeiro superior de Telecomunicacións, escritor, compositor e articulista, Xavier Alcalá Navarro, con catro vicepresidentes nas persoas de Manuel González, secretario da Real Academia Galega (RAG), como vicepresidente primeiro; José María Pousada Carballo, director da Escola Técnica Superior de Enxeñeiros de Telecomunicación da Universidade de Vigo (ETSET), como vicepresidente segundo; Rafael Juanatey, subdirector xeral de Desenvolvemento da Sociedade da Información da Consellería de Innovación e Industria, como vicepresidente terceiro e de Ramón María Lois Santos, secretario xeral do COETG e coordinador xeral do proxecto, que ocupa o cargo de vicepresidente cuarto. O xerente do COETG, Ricardo Fernández, ocupa o cargo de secretario do Comité Directivo do proxecto.

• D. Ramón María Lois Santos, Secretario Xeral do COETG.
• Dna. Pilar García Negro, Profesora de Filoloxía Galego-Portuguesa da Universidade da Coruña.

Clausura o acto o Conselleiro de Innovación e Industria, D. Fernando Xavier Blanco Álvarez.Ao remate do acto servirase un viño de honra.

MÉRCORES, 14 DE MAIO: Da Sociedade da Información á Sociedade do Coñecemento en Galicia



Organizan: COETG-INEO

Lugar: Salón de Actos de Zona Franca, Area portuaria de Bouzas s/n, Vigo

Hora: 13:00 hs.

Interveñen:

• D. Miguel Merino Gil, Vicedecano do COETG.
• D. Jorge Cebreiros Arce, Presidente de INEO.
• D. José de la Peña, Director de Relacións Corporativas Territoriais de Telefónica

Ao remate do acto servirase un viño de honra.

O salto da Sociedade da Información á Sociedade do Coñecemento, a debate nunha mesa redonda organizada polo COETG e por INEO

Con motivo da celebración do Día Mundial das Telecomunicacións e da Sociedade da Información, o 17 de maio, o Colexio Oficial de Enxeñeiros de Telecomunicación de Galicia (COETG) celebrou hoxe en Vigo unha mesa de debate baixo o título ‘Da Sociedade da Información á Sociedade do Coñecemento en Galicia’, na que se expuxeron as claves do presente e do futuro da Sociedade da Información a nivel galego.


Na mesa redonda interviron o vicedecano da COETG, Miguel Merino Gil; o xerente da Asociación Multisectorial das NovasTecnoloxías da Información e da Comunicación en Galicia (INEO), Manuel Soliño Bermúdez; e o director de relacións corporativas territoriais de Telefónica, José de la Peña Aznar.

Durante a súa intervención, De la Peña analizou catro realidades sobre o estado actual das telecomunicacións en Galicia e catro tendencias de cara ao futuro no mesmo eido. Entre os cambios máis significativos que citou no seu relatorio, destaca a incorporación da banda larga, tanto fixa como móbil, e os cambios no modelo de negocio e sectores influenciados polas TIC.


Baseándose no Informe Telefónica sobre a Sociedade da Información do pasado ano 2007, espuxéronse tamén os principais trazos da sociedade da información a nivel español, aplicables tamén ao modelo galego. Entre eles, subliñaron especialmente o crecemento do número de internautas e o uso intensivo de servizos ou a banda larga e a súa mellora de forma progresiva, que se estende xa a áreas rurais. Este último aspecto é unha característica especial no caso galego, que está tentando levar as novas tecnoloxías aos núcleos de poboación máis dispersos do territorio.


Así mesmo, a nova Sociedade da Información e do Coñecemento está marcada, tal como sinalaron os expertos nos seus discursos, polos movementos de concentración das grandes empresas e medios electrónicos, a busca de novas categorías de terminais, a revolución da televisión cara a Televisión Dixital Terrestre (TDT) ou a transformación do ocio e dos servizos de entretemento.

Asistiron en representación do COETG o Decano, Ramón Bermúdez de Castro Olavide, e o Xerente, Ricardo Fernández Fernández

VENRES, 16 DE MAIO: As TIC e o Dereito á Saúde

Organiza: COETG.

Colabora: Consellería de Sanidade.

Lugar: Hotel Meliá María Pita-A Coruña

Hora: 13:30 h.

Interveñen:

• D. Ramón Bermúdez de Castro Olavide, Decano do COETG.
• Dna. Mar Pereiro Álvarez, Subdirectora Xeral de Información e Servizos
  Tecnolóxicos. Consellería de Sanidade.
• D. Ricardo Fernández Fernández, Xerente do COETG.

Clausura o acto a Conselleira de Sanidade, Dna. María José Rubio Vidal.

Nunha xornada na Coruña, expertos avogaron por empregar sistemas como a receita electrónica ou a dixitalización da imaxe no eido sanitario co fin de mellorar a calidade de vida das persoas

O Colexio Oficial de Enxeñeiros de Telecomunicación de Galicia (COETG) considera as novas Tecnoloxías da Información e da Comunicación (TIC) unha ferramenta clave de cohesión social que pode aproveitarse en diversas magnitudes da vida cotiá. Por este motivo, e para conmemorar o Día Mundial das Telecomunicacións e da Sociedade da Información, que se celebra mañá, 17 de maio, o COETG faille un chamamento á administración para aproveitar as TIC na mellora da calidade da sanidade pública a través, fundamentalmente, da telemedicina.

Para festexar esta data, o COETG, en colaboración coa Consellería de Sanidade, vén de celebrar unha mesa redonda presidida pola titular do departamento, María José Rubio Vidal, que levou por título ‘As TIC e o dereito á Saúde’, e no que que interviron tamén o decano do COETG, Ramón Bermúdez de Castro Olavide; a subdirectora xeral de Información e Servizos Tecnolóxicos, Mar Pereira Álvarez e o xerente do COETG, Ricardo Fernández Fernández.

Durante a xornada, os relatores insistiron na importancia de aproveitar os avances tecnolóxicos para posibilitar a mellora dos servizos sanitarios. Entre os adiantos a implantar, destacaron a telemedicina, a tarxeta electrónica ou a dixitalización da imaxe. Neste sentido, referíronse ao importante papel do proxecto Rede de Saúde, iniciado pola Consellería de Sanidade en 2006 como ferramenta de innovación para a mellora da xestión dos centros sanitarios e para achegar á cidadanía uns servizos sanitarios de calidade.

O Colexio Oficial de Enxeñeiros de Telecomunicación de Galicia insistiu tamén na importancia de fomentar as TIC na sanidade a fin de mellorar a calidade de vida das persoas, conectando co lema que a Unión Internacional de Telecomunicacións (UIT) escolleu este ano co gallo da conmemoración do 17 de maio: ‘Conectar ás persoas con discapacidades: as oportunidades das TIC para todos’. Así, a través dunha mellor aplicación das tecnoloxías no eido sanitario, conseguiríase tamén superar a fenda dixital e facilitar deste xeito o acceso de todos os cidadáns por igual a mellores e máis rápidos servizos de saúde.

Fotos da Xornada "As TIC e o Dereito á Saúde" (16-05-2008)

Organiza: COETG.

Patrocina: Fundación Caixa Galicia.

Lugar: Auditorio da sede da Fundación Caixa Galicia (A Coruña)

Hora: 20:30 h.

Reserva de entradas: tel. 981919300

Descargar programa

O Colexio Oficial de Enxeñeiros de Galicia organiza a primeira edición deste evento no marco da celebración do Día Mundial das Telecomunicacións

Co gallo do Día Mundial das Telecomunicacións, que se celebra o 17 de maio coincidindo co Día das Letras Galegas, o COETG organiza unha serie de actos nos que se conmemora esta data, entre os que se atopa o I Concerto das Telecomunicacións, que tivo lugar esta tarde no Auditorio da Fundación Caixa Galicia na Coruña.

O concerto, no que se deron cita máis de douscentos enxeñeiros, estivo interpretado pola Orquestra de Cámara de Galicia, e dirixido polo compositor, director e pedagogo Rogelio Groba, autor de preto de trescentas obras que abarcan todos os xéneros.

O repertorio estivo integrado por Zarabanda sobre un tema de Haendel, de R. Groba; Concerto en La Menor de J.S. Bach; Introducción e rondó caprichoso, de C.Saint-Saëns e A casa do demo, de L. Boccherini.

Fotos do Concerto das Telecomunicacións (16-05-2008)